Saturday, November 17, 2012

ورد الصباح

شقشقه عصافير.....قرص شمس كبير ....نهار بيطلع على قلوب  صغيرين

 

بسمه فى كل عين بتشوف ورد الصباح بيتفتح ....شنطه و كراسه و قلم و موضوع تعبير ف حب  مصر والمدرسه و رسمه ف كراسه عليها العلم...

متلون بأحمر لون خدودهم و أبيض لون براءتهم و أسود اللى عمره ما خطر على بالهم 

و جرى بسرعه و تطنيط يلا ع المدرسه متأخرين .....و بوسه على خد ماما هتوحشينى ....

رايحين المدرسه يلا قربنا نوصل .....ميعرفوش ان فى ناس متعرفش ميعاد للشروق ميعرفوش انى فى قلوب عاشقه الغروب ....ميعرفوش ان ورد الصباح ممكن يموت ..

 

راح ورد الصباح  مش باقى منه غير بوسه على خد ماما و حسره و ألم  و دموع و أهات ووجع

مش باقى منه غير كراسه مرسوم فيها العلم ....متلون أحمر لون دمه ...أبيض لون كفنه ....أسود لون حداد أهله

 

راح ورد الصباح  

 

3 comments:

  1. 17-Nov-2012
    حادث قطار و أتوبس أسيوط
    نسال الله الصبر و السلوان لأمهات الأطفال

    ReplyDelete